xoves, 22 de xuño de 2017

As nosas fotos nas X Xornadas dos Clubs de Lectura

Despedimos o curso lector coas nosas fotos nas X Xornadas dos Clubs de Lectura desenvolvidas  en Santiago o día 17 de xuño.

Autógrafo de Ledicia Costas

Non só nos mergullamos nas distintas actividades, senón que tamén houbo tempo para facer migas cos clubeiros do IES de Poio cos que esperamos contactar á volta do verán.

luns, 19 de xuño de 2017

17 de xuño, X XORNADA DOS CLUBS DE LECTURA



 Este pasado sábado, 17 de maio, unha representación de clubeir@s do  noso club de lectura que se chama A PRAIA DAS PALABRAS chegou disposto a SOMERXERSE!!! nas moreas de actividades e obradoiros que lles tiñan preparado desde a Asesoría de Bibliotecas Escolares. Comezamos a mañá entregándolle o Premio dos Clubs de Lectura 2017 a Miguelanxo Prado. 

Continuamos co relatorio inaugural a cargo de Óscar López do Programa Página Dos, que rodeado de rapazada de distintos clubs de lectura explicounos coa axuda do cámara como facer reportaxes en vídeo sobre libros. Para iso contou tamén coa axuda da booktubeira, Violeta Moon e da escritora Ledicia Costas, á quen unha das clubeiras lle fixo unha minientrevista en directo. 

A seguir, @s nos@s clubeir@s asistiron ós respectivos obradoiros e charlas: obradoiro de cómic con Xosé Tomás e encontros con autores de "Literatura de viaxes" con Andrea Maceiras, Rosa Aneiros moderado por Montse Pena Presas; mesa de autores/autoras sobre as "Claves literarias para tres voces de éxito" con Antón Riveiro Coello, Ledicia Costas, Pedro Feijóo moderada por Ramón Nicolás; encontro con Marcos Calveiro e mesa de autores e autoras  novos "Botarse a escribir"con Berta Dávila, Rosalía Fernández Rial e  Tamara Andrés  moderada por Francisco Castro.


Pola tarde contabamos coa presenza do escritor, César Mallorquí, que nos engaiolou co seu "Eloxio á mala literatura", explicándonos que o de ler é o vicio máis san que existe. 

Non faltou un momento para estar  eles, en primeira liña, a pedirlle un autógrafo.








O peche da Xornada correu a cargo do pandereteiro, Xabier Díaz, e as Adufeiras do Salitre e foi un final de festa en todo o sentido literal da palabra, xa que non faltaron cantos e bailes dos asistentes para animalo.



Podes atopar máis fotos e minivídeos desta actividade na seguinte ligazón: https://goo.gl/photos/e3ffbAT8aLsMgy6h7

mércores, 7 de xuño de 2017

X Xornadas dos Clubs de lectura.

Este ano volvemos c@s clubeir@s a Santiago. Alí estaremos co grupo do club de lectura de 3º ESO A, que son tamén os voluntarios da biblioteca.

O 17 de xuño, en Compostela, celebrarase unha gran "quedada lectora" de integrantes dos clubs de lectura dos centros de ensino secundario de Galicia. Unha boa representación dos preto de 11.000 lectores e lectoras que, de forma periódica, se xuntan para compatir experiencia arredor dos libros e da lectura polos institutos e outros centros de ensino galegos, terán a oportunidade, xunto co profesorado que coordina estes clubs, de atoparse, compartir lecturas, experiencias e un importante número de actividades en compañía de autores e autoras (Pedro Feijoo, Marcos Calveiro, Ledicia Costas, Carlos Negro, Rosalía Fernández Rial, Suso Fraga, Andrea Maceiras, Rosa Aneiros, Miguelanxo Prado, María Reimóndez, Miguel Anxo Fernández, Antón Riveiro Coello, Antía Otero, Xosé Tomás, Fran Alonso, Berta Dávila, Tamara Andrés e Francisco Castro). Entre outros participantes nesta X Xornada dos Clubs de Lectura, Óscar López, xornalista cultural (Página 2), ou Luís Pardo (cadena Ser); críticos como Ramón Nicolás ou Montse Pena Presas; expertos do mundo da dobraxe (Anxos Ferradáns) e do cine (Jorge Coira) ou narradoras, como Soledad Felloza,  compartirán coas lectoras e os lectores o seu tempo e as súas experiencias. As regueifas, o rap, o graffiti tamén estarán presentes, así como o teatro, o circo e a música tradicional galega (Xabier Díaz & Adufeiras de Salitre). Haberá sesións específicas para profesorado que coordina os clubs de lectura, con Inés Miret e Mercedes Queixas. O final literario correrá a cargo de César Mallorquí, Premio Nacional de Literatura Infantil y Juvenil 2013 e Premio Cervantes Chico 2015 a toda a súa obra xuvenil,  un dos autores en lingua castelá máis lidos polos clubs de lectura ano tras ano.
Unha grande celebración co gallo dos dez anos continuados da iniciativa CLUBS DE LECTURA nos centros de ensino secundario de Galicia, dentro do programa HORA DE LER para o fomento da lectura no ámbito educativo.

http://lerenmancomun.blogspot.com.es/2017/05/unha-decada-de-clubs-de-lectura-habera.html

luns, 5 de xuño de 2017

Lorca está de aniversario


Un 5 de xuño de 1898 naceu Federico García Lorca en Fuente Vaqueros, Granada. Estamos a falar dun dos poetas e dramaturgos españois de máis influencia e popularidade na literatura española do século XX.

Nesta ligazón http://federicogarcialorca.net/ podes atopar máis información.

sábado, 3 de xuño de 2017

Roteiro a San Simón e Salinas do Ulló.


O pasado martes, 30  de maio, visitamos a illa de San Simón e as Salinas do Ulló en Vilaboa. O noso roteiro xuntou a rapazada dos seis grupos de club de lectura, os únicos que quedaron fóra foi o alumnado dos dous club de lectura de 2º de bacharelato por razón obvias.

Fomos un total de 50 rapaces con catro profesores os que percorrimos as distinta épocas da illa de San Simón, desde o medievo da man da cantiga de Mendiño, até a epoca da posguerra con textos como o de Agustín Fernández Paz Noite de voraces sombras e O lapis do carpinteiro de Manuel Rivas.




Houbo unha mención especial a Xulio Verne, non en van os nosos clubeiros de 3º de ESO, leron como lectura obrigatoria Xules Verne e a vida secreta das mulleres planta de Ledicia Costas. E tampouco quedou fóra a poesía de Antón Reixa parodiando a de Mendiño.

Pola mañá contamos cunha guía que nos puxo o día de toda a historia coa que conta a illa e pola tarde deu tempo a facer unha xincana, para comprobar a adquisición de todos estes coñecementos por equipos, que contou cun implicación dos clubeiros ó cen por cen. Logo houbo un momento de lecer na carballeira ó carón do museo de Meirande antes de visitar as Salinas de Ulló. Tamén tivemos un momento de baile no barco de volta ó noso destino. Foi unha xornada do máis completa: historia, literatura, xincana, música, baile, xogos de cartas e paseos.

Aí vos quedan as ligazóns a todas as fotos deste día: fotos do roteiro á illa de San Simón  e máis fotos.



venres, 19 de maio de 2017

"Vento ferido"



"Vento Ferido" é unha mediametraxe nacida no obradoiro audiovisual do CeMAC, o Curso de Medios Audiovisuais de Celanova. Naceu no verán do 2015 inspirándose nas verbas do autor galego Carlos Casares, e o resultado pódese comprobar sobre estas liñas. 

 "Por moito que intentemos escapar do pasado, dun xeito ou outro, este sempre volve a nós. Isto é o que lle ocorre a Milo, un rapaz de 23 anos que debe regresar á súa vila natal anos despois de escapar dela. Á súa volta descubrirá que tivo motivos máis que suficientes para marchar, e o que parecía un grato reencontro coa familia e os amigos, converterase nun día que xamais esquecerá, no que as fantasmas do pasado non pasarán desapercibidas."

venres, 5 de maio de 2017

"Hora zulú" en 1º de bacharelato A


O alumnado de 1º de bacharelato A anda enleado na lectura de "Hora zulú" de Santiago Lopo. Engaiolados co tipo de estrutura da novela que chega a nós a  través de distintos textos fragmentarios: informes médicos, notas de cadernos persoais, actas dunha organización non gubernamental, correos electrónicos, poemas, etc., andamos á procura de desantrañar o quebrecabezas de historias que aparecen na obra.