35 alumnos e alumnas
pertencentes aos clubes de lectura do IES de Vilalonga participaron na
saída que tivo lugar o pasado 19 de maio.
Á chegada á cidade
de Lugo comezamos o roteiro cun breve percorrido pola muralla romana dende a
Praza de Campo Castelo ata a Porta do Carmen ou Porta Miñá facendo unha parada
na mosquera (onde está á única ventá
conservada) na que unha alumna leu a Ode
á cidade de Lugo de Manuel María. Na porta do Carmen limos a inscrición
adicada ao trobador medieval Fernando Esquío, logo un alumno leu en voz alta un
poema deste trobador e finalmente unha alumna leu un poema de Manuel María
adicado a esta personaxe.
Continuamos o
percorrido cara a Praza do Campo onde repartimos un plano da cidade a cada un para logo dirixirnos á Domus de Mitreo onde un arqueólogo nos
falou desta casa romana e os restos que aínda se poden ver nela.
Tras esta
interesante visita entramos na catedral pola porta da Misericordia
(excepcionalmente aberta este ano) para visitar o seu interior. Á saída
admiramos o pórtico, o Bispado e a piscina romana na Praza de Santa María.
Dirixímonos logo á Praza Maior na que se atopa o edificio do Concello para ir
logo á Casa dos Mosaicos (unha casa
romana baixo terra) na que nos explicaron as características da mesma e na que
puidemos observar o magnífico mosaico que lle dá nome. Continuamos o noso
percorrido cara á Praza de Santo Domingo coa súa aguia imperial e o convento de
Sto. Domingo para ir logo cara ó Palacio de San Marcos, sede actual da Deputación
diante da que se poden observar os restos dun acueducto romano.
Finalizamos o
percorrido na Praza Maior onde tivemos tempo para comer e onde o alumnado fixo
unha xincana que consistía en atopar o nome do autor ou autora aos que se
referían unhas preguntas. As respostas se obtiñan lendo as inscricións das placas
con bustos que hai na praza e na rúa contigua.O percorrido pola cidade foi
acompañado de explicacións breves sobre a historia da cidade e os edificios máis
emblemáticos da mesma.
Despois da pausa
para comer e logo de facer a xincana collemos o autobús para ir á Casa Museo de
Manuel María onde tiñamos cita para unha visita comentada e guiada. Durante
esta visita puidemos coñecer un pouco mais este autor, a casa protagonista do
seu libro “A casa de Hortas” e escoitar uns poemas interpretados con moito sentimento
polo propio autor nun vídeo.
Ningún comentario:
Publicar un comentario